Einigung zwischen Johann Thoss zu Cathewitz und Abt und Konvent zu Buch wegen des Zinses vom Vorwerk Cathewitz.

1506 Oktober 27; Belgern.

Druck: Misc. Sax. VI (1772), S. 186-188.

Gunther von Huldo zu Kreischau, Johann Falcke zu Triestewitz und Sekretär Martin Rotlebe schlichten einen Streit zwischen Abt Anthonicathewitzus und dem Konvent von Buch und Johann Thoss zu Cathewitz um die fälligen Zinsen an das Kloster und den Pfarrer von Belgern.
Gegeben im Jahr 1506, in Vigilia Simonis et Jude.

Misc. Sax. VI.

Zuwissen, das wir hirnach geschriebenn, Gunther von Huldo zu kreyschaw, Jhan Falcke zw Tristewitz, vnnd Martinus Rotlebe Secretarius, In den gebrechenn So sich zwuschen dem Erwirdigenn Inn got uater vnd herrn Herrn Anthonio Apt zum Buch vnd dem Conuent daselbst an eynem, Vnd Jhan Thosen zu Cathewitz anders theils von wegen des Zinßs, So gemelter Those dem Apt vnnd Conuent berurts Closters Jerlichs vom Forwerck zu Cathewitz zu thun schuldig, vnd des etlich Jar zugeben außflucht vnnd weigerunge gesucht, Nach verhorunge vnd erfindung der gebrechn die wie hirnach folget gutlich vertragenn vnnd beygelegt, das sie auch von beyden teyln bewilligt vnd angenomen habenn, Vnd nemlich Also Es Sal Jhan those dem Apt bemelts closters Oder dem pfarrer zu Belgern yzt vf allerheyligen tage schirst zwey malder korns geben vnd entrichten Vnd darnach vf aller heiligen tage So man xvC vnd Sieben Jar schreiben wirdet aber zwey malder, Also das die versessen vnnd ander Zinse von gedachten vorwerck herrurende sampt den So ym der Apt vf vnnser furbete erlassen gantz vnnd gar entricht vnd bezalt seyn, Vnd es sal Jhan those ehgemeltem Apt vnd Conuent von berurttem vorwerg Cathewitz hinfurder aller Jahr Achtzcehen scheffel korn gebenn In allermassen wie er vnd seyn vorfarrn hieuor allewege getan habenn, vnd er vnd seyn erbenn Sollen deßhalb zu ewigen gezeiten keyn vßflucht oder helfrede suchen. Wurde sichs aber begeben das Jhan those seyn erben oder nachkomenn der Elbe oder sunst missewachse halbenn im Jar vngeverlich schaden nemen wurden, So sal der Apt oder pfarrer zu Belgern vnnd yre nachkomenn mit entrichtunge der Achttzehen scheffel korns biß zum andern Jahre gedult vnnd mitleyden habenn, Doch also das es zum andern Jahre gutlich entricht, Ader aber mit des Apts oder pfarrers willen gehalten werde, Alle arglist vnnd geuerde hir Inn awßgeslossen, Vnd des zu merer sicherheyt stetter vnnd vester haltung Ist dießer Receßs gezweyfacht Eyner vom Apt versiegelt, Thosen behendet der ander von Thosen besiegelt vnd dem Apt vbergeben. Gescheen zu Belgern Dinstags Vigilia Simonis et Jude Anno Domini Millesimo quingentesimo Sexto.