Der Rat der Stadt Leisnig bestätigt die Stiftung einer ewigen Messe durch Johann Güntzel.

1398 Dezember 27; Leisnig.

Druck: Kreysig (1755), Dipl. Nachtrag zur Historie der Stadt Leißnig VI., S. 130-132.

Johannes Nuwendorff, Burgermeyster, Nickil Czschummeler, Conrad seyler, Nickil gundolff, Jacoff snyder, Heynemann fleyschhauͤwer, gesworene der Stad Lisenig, bekennen öffentlich, dass unser Mitbürger Johann Güntzel drei Schock Zinse vom Rathaus gekauft hat. Bei einer Neuordnung der Zinsen hat er sie einer ewigen Messe zugeeignet. Da die Zinsen sehr zerstreut sind, hat der Rat bis zu einer Neuregelung diese Urkunde gegeben, in der dem Pfarrer zweimal zwei Schock Zinsen zugesichert werden.

Kreysig (1755).

Wir Johannes Nuwendorff, Burgermeyster, Nickil Czschummeler, Conrad seyler, Nickil gundolff, Jacoff snyder, Heynemann fleyschhauͤwer, gesworne der Stad Lisenig, bekennen offintlich an desim offenem briffe alle den, sy yn sehn, hören addir lesin. Alzo vormals Johannes guͤnczel, vnser mitteburger, iij schog gelegin an ackir vnde beckerczinse vor vnde yn vnsir stad an enczeln groschin vnde hellern gekouft hot, vmme syne phennynge, vnde von sundirlichir gunst wegen, dy er czu vns hatte, vnde vnserm goteshuze, lyz her vns dyselbin czinse lyehn vnde eygen den irluchsten vnde Hochgebornen fuͤrsten vnsern Herren Herre Wilhelm margrafen czu Myssen. Nu von sundirlichir ynnekeit wegen hot her dy selbigen czinse bewist czu eyner ewigen Messe vnde Altere, der gebüwet vnde gestifft ist yn vnser kirchen yn gotes vnde der Eylftuzund Juncvrauwen Ere, vnder dem gewelbe, dorczu ouch obgeschrebene vnser Herre Herre Wylhelm dorvmme dy egnanten czinse von nuwes geeigent hot. Hot vns gebeten der Egeschrebene Johannes günczel, daz wir vorczegen der lehn vnde czinse, habe wir angesehn syne Innekeyt, dinst vnde truwe, dy her hot czu vns vnde vnser stad, vnde vorczygen vns kegenwerticlich yn desim brife der lehn vnd czinse vor vns vnde aller vnser nachkomelynge, vnde lazin vnserm pharrer, der dy meße vorwesin sal, wylleclich vnde mit wolbedachtem müte dyselbin czinse gerne volgen. Doch sint dem mol daz dyselbige czinse Eezwas czustrouwet vnde vorwarren sint, vnde durch dez willen, daz sich vnser pharrer mit onsern mitteburger, dy den czins gebin sullen, icht gremen vnde den vorgeschrebin czins icht ynnemen dörffe, Globe wir obgeschrebin Burgermeyster vnde Rateslute, daz wir denselbin czins ynnemen wollen, vnde dem pharrer dry schog czinses, alle Jar ij uff sente walporgis tag, vnd ij uff sente Michaelis tag gebin vnde reychin wöllen von vnserm Rateshuze willeclich ane arg, addir virczentage dornoch. Were abir, daz wir addir vnser nachkomelynge mit gotis hulfe alz stathafft worden, daz wir andere czinse gekoufen mochten addir bewysin, dy do alzo gewyz weren, alz dy czinse, dy wir ym gebin von vnserm rateshuze, zo sal vns der pharrer addir eyn anderre syner nachkomelynge vnsern briff weddir gebin. Daz alle dese vorgeschrebene rede vnde gelöbde stete vnde gancz gehalden werden, von vns vnde alle vnsern nachkomelyngen, dez habe wir czu eynem waren bekentnyz vnser Ingesigil lazin hengen an desin offenen briff, der do gegebin ist noch gotis gebort driczenhundirt iar, dornoch yn dem acht vnde Nunczegisten Jare, an dez heyligen sente Johannes Evangelisten tage.