Abt und Konvent zu Buch überlassen dem Rat zu Belgern das Lehen des Schützenaltars in der Kirche Belgern.

1479 März 26; [Buch].

Original im Rathaus Belgern (Stand 1774).
Druck: Misc. Saxon. VIII (1774), S. 322-323. Bertram, Chronik von Belgern, XXI. S.156.

Abt Simon und der Konvent zu Buch geben dem Rat zu Belgern das Recht, den Schützenaltar der Kirche Belgern zu verleihen.

Gegeben im Jahr 1479, am freytage nach annunciationis gloriosae virginis Marie

Bertram XXI.

In gotis Namen, Amen. Wen alle geschichte vnd rethe von gebrechlichkeit wegen menschlicher natur vorgeßlich sindt, darumb das wol redelich vnnd not ist, des man menschliche wergk vnd rethe, vnnd sunderlich die Got czu lobe vnnd seiner gebenedeyten Mutter Marien czu einer Irbittunge zcu lobesagunge allen gotl. Heyligen gewürket, vnndt gethan werden, mit orkunde der Schriftt vnnde mit briffen bevhestiget vnnd vorzeichnet werden, dauon wir Symon apt, Laurentius prior, Nicolaus underprior, paulus keller, Nicolaus Bursach, Michael custos vnnd gemeyniglich die gantze sammelunge zcum Buch bekennen eyntrechtiglich vor vnns vnnd vnser nachkomlinge, vnnd tun kundt, ydermenniglich, die diesen vnßern offenen briu sehen horn ader lesen, des wir mit wohlbedachtem Mute vnnd gueten willen geben haben und geben in vnd mit krefft ditz briues dem Rath czu Belgern vnsern Lieben getrewen gantze Macht czu vorleihen den Schutzenaltar doselbst also oft daselbige Lehen Todeshalbenn eynes briesters vorfällt ader Loß stürbet angesehen, das fromme Lewte dasto baß darzu geneiget Hülff vnnd Beistandt Irzceigenn wurdenn, auch des mehr Vffsehens vnnd vleiß von vnserm rodt doselbst by demselbigen lehen angekahrt mochte werdenn. Des czum waren Bekenntenuß haben wir Symon apt vnnser epteyen mit sampt des gantzen convents Sigillen wissendlich vnnden an diesen offenen brieff lessen hengenn. Der gegeben ist nach Gots Gebort tusend Vierhundert darnach in dem newn vnnd sibentzigsten gar am freytage nach annunciationis gloriosae virginis Marie.