Der Rat zu Leisnig ordnet die Einkünfte des Altars Conceptionis Mariæ.

1464 Juni 24; Leisnig.

Druck: Kreysig (1755), Dipl. Nachtrag zur Historie der Stadt Leißnig IX., S. 137-138.

Der Rat zu Leisnig fixiert nach vielen Änderungen in Abstimmung mit den Altarleuten die Ausstattung des Altars Conceptionis Mariæ auf 30 Groschen, 15 zu Michaelis und 15 zu Walburgis.

Kreysig (1755).

Wir Rathisluthe der Stadt lißnigk die zceit Burgermeister Nickel Smidt, Rathmanne Nickel Jahn, Titcze becker, Peter Stehil, mathis Tegkewitcz vnde andere Gesworne Rathmanne, Bekennen vor vns vnde alle vnnsere nachkomenden In dißem vnnsern offin brieffe vor allermeniclich, die on sehen, horin adir leßen, das wir nach aneweysungen vnnser Eldisten mit den Erßamen die zceit alterluthe Titcze becker, Nickel iahn, vnnsere eidgenoßen, Sind gantcz eyntrechticlichen eyns wurden. Nach dem vnde also wir von vnnsers gotshußes wegen das nuwe Altar Concepcionis marie In vnnser pfarrekirchen zcu lißnigk von nuwis uff gestifft vnde bestetigit habin von wegin solcher almoßen, vnde hulffe, die denn ettliche Innyge menßchen darzcu gegebin, vnde bescheiden habin, vnd wir ouch zcu dem gnanten Altare ettliche namhafftige gutere, also weßin, holtcz, grunde vnd czinße gegebin vnd geeygint habin, also denn die Confirmacion des selbigen altaris wol Inneheldet, vnd clerlich ußweiset. Nu obir dieselbige Confirmacion, vnde das solch altar diße baß bekrefftiget, vnd die begerungen der Innygen menschen, die ore almoßen darczu gegebin habin vmb irer selen selickeit willen, vnd gotisdinst disto forderlicher volbracht vnd volanth werden moge, Szo sollen vnde wollen die alterluthe vnnser pfarrkirchen obingnant vnd alle ire nachkomende alle iar ierlichen ewigis zcinses reichen vnd gebin von des gots hußes wegen, dem besitczer des obgnanten altaris, vnd seynen nachkomenden besitczern dreyssig großchen nuwes geldis, also denn uff igliche tageczeit In vnnser hern lande genge vnd gebe sien wirdet, funffczehen großchen uff Michaelis, vnd funffczehen großchen uff walpurgis, also das solche dreyßig großchen obgnant ierlichen zcu solchem altare vom gotshuße gegebin werden, alle geferde vnd argelist hendan satczt vnd ussgeslossen. Das solchs gantcz, stet vnd vnuorruckt gehalden werde, zcu Orkunde habin wir obgedachten Burgermeister vnd Gesworne Rathmann vnnser der Stadt Secret vnden an dißen offin briff wißentlich laßen hengen. Der gegeben ist nach Crists geburt vierczehinhundert und Im viervndsechczigisten Jarn, an sant Johannis abende des tewffirs.