Johannes Wortczen, Domherr zu Altenburg stiftet ein Salve regina und Commemoration zu Leisnig.

1439 März 25; Leisnig.

Druck: Kreysig (1755), Dipl. Nachtrag zur Historie der Stadt Leißnig VIII., S. 133-136.

Hans Ritter, Bürgermeister, Jakoff bogk, Matthei zciselman, Cleyne Michel, Nickel leman, Martin Roder, Ratsleute der Stadt Leisnig bestätigen den Kauf eines jährlichen Zinses Freiberger Münze von unseren Stadtzinsen für 24 Schock guter neuer Groschen Freibergischer Münze durch Johannes wortczen, Domherr zu Altenburg, vor Zeiten Pfarrer zu Leisnig. Es folgt eine sehr ausführliche Aufzählung, was zu bestimmten Zeiten an welchen Stellen der Kirche zu singen ist und wem wieviel dafür zu bezahlen ist. Weiter folgen Anweisungen für die Zeit nach dem Tod des Stifters.

Gegeben nach gots geborten virczenhundert Jar, darnach in dem xxxix Jahre, an dem abunde vnser liben frauwen tage klibe, den man nennet zcu latin annunciacionis marie.

Kreysig (1755).

Wir Hanns Ritter, Burgermeister, Jacoff bogk, Matthei zciselman, Cleyne Michel, Nickel leman, Mertin Roder, Ratczluthe vnde dy gantcze gemeyne der Stad lißnigk bekennen vor vns, vnde alle vnser nachkomelinge in dißem vnßern uffin briue vor allen, die en sehen, addir horn lesen, das der Erbare here Er Johannes wortczen thumherre zcu Aldenburgk, vor gecziten vnser pharrer zcu leißnigk, zcu vns koufft had Recht, redelich vnd Erbarlichen zcwei schogk nuͤwer groschen ierlichis zcinß friberischer muncze, von allen vnßeren Stadzcinsen, renthen vnd jnmanunge, die wir von vnßer Stad wegin uffzcuhebin habin, vnd ynczunamen, vnd haben em dij vorkoufft vnd gegebin vmb virenczwenczigk schogk guter nuwer groschen friberischer muncze, dij er vns recht, redelich vnd nutczlich wol beczalt had, vnd wir die an vnser Stad nutcz vnd frommen merglich gewand haben. Der Selbigen beczalungen sagin wir en queid, ledigk vnd loß, in crafft dißis briues. Ouch derselbie Er Johannes betracht, das nicht gewißers ist denn der tod, vnd nicht vngewißers wenn die stunde des todis, vnde had gote vnd seyner liben muter der reynen iuncfrauwen marie vnd aller gots heiligen zcu labe vnd zcu ere, seyner vnd seyner eldern selen zcu troste vnd zcu seligkeit von dem egnanten zcwei schogken zcinß anderthalb schogk grl. vor stund, benumt vnde laßen folgen, darvmb man sal singen ein ewigk Salue regina yn vnser pharkirchin, ye in der wochen zcweyne tage, an dem fritage vnd an dem Sunnabunde zcu abunde, vnd mit geluthe vnd geluchte begehin, als ma pflegit in der uasten zcu thunde, vnd alzo hernoch geschrebin stehit. Czum erstin sal der gelackener am abinde luthen ein gut pulß mit der großen gelackin, vnd licht enpornen, vnd der schulemeister mit seynen gesellin vnd schülern sullin singen Salue regina, vnde dornoch eyne antiphona von vnser libin frauwen, Tota pulchra es amica mea, eynen tagk, den andern, Anima mea liquefacta etc. addir descendi etc. dornach zcwene schuler sullen khyen vor vnser libin frauwin altar vnd sprechin das versikel, Aue maria gracia etc. vnd eyn Capplan eyne Collectan vor vnser libin frauwen, Concede misericors etc. Darnach sullen dij zcwene schuler anhebin dij antiphona, da pacem Domine etc. dri stund, vnd der kor sal sij dri stund volbrengin, vnde denn dij schuler eyn versikel, fiat pax in virtute tua etc. Darnach der capplan eine Collectan pro pace sprechin, so sal man denn ouch luthen das aue maria, vnd gote bitten vmb seynen ewigen freden, das ist got selbir. Alzo sal mans haldin alle wochin obir das Jar, ußgesloßen dij vaste vnd den Aduenth, do man vor singet Salue regina. Ouch zcwuschin ostern vnd phingisten pfleget man zcu singen, Regina celi, das ist kortcz, so sal man dorczu singen yn der zceit das respons. Christi uirgo etc. ut p. Dar umb sal man alle iar jerlichin dem pfarrer acht gr. geben, vnd seynem Capplan Sechs grossen walpurgis, vnd zech michaelis, dem schulmeister zcweyendrißigk, funffczen walpurgis vnd sobenczen michaelis, dem kirchener dreyenczwenczigk p. walpurgis und xiij michaelis, vnd xv gr. zcu geluchte obir Jar, das macht andirhalb schogk groschin. So blibet noch do eyn halb ß. gr. oberigk, das gelabin wir obgnanten vorkouffer dem selbien Ern Johannes alle jar zcu reichen vnd zcu gebin, dy wile er lebit, funffczen gr. uff walpurgis vnd funffczen uff michaelis. Wenn her abir von dißer werlde scheidet, so sal das halbe schogk volgen zcu seynen Jargecziten vnd zcu seyner Commemoracion, alzo doch, das zcen groschen ye zcu einer sunderlichen commemoracion sullin volgen, als her dij wert bestellin. Vnd dij Jargeczijt vnd commemoracion sal man halden vnd ye czen groschen darczu gebin vnd teilin, alzo hernoch geschrebin stehit. Czum erstin alzo her von dißer werlde scheid, so sal man eyn schon pulß mit allen gelacken luthen, vnd eyne schone vigilie mit ix. letezen singin, vnd dij sullin dij pristere singin, der pharrer mit seynen capplan, mit czwen altaristen corporis cristi vnd crucis, vnd mit dem kirchener. Und dij Commemoracion obir eyn halb jar darnoch, vnde denn des morgens sal man singen eyne selemesse zcu der hoemessin, vnd gote mit vleiße bitten vor seyne vnd seyner eldern selen. Ouch sal man noch seyme tode alle Suntage noch der predigiten vor seyne vnd seyner eldern uffinberlichin bitten in der kirchen, do vor allis sal man dem pfarrer ye zcu der Jargeczijt adir Commemoracion gebin czweyne groschen, dem prediger vir alde groschen, dem secundario eyn gr. zcwen altaristen in der kirchen iczlichem eynen groschen, dem kirchener eynen groschen, das her luthet vnd hilfft vigilien singen, vnde eynen groschen den Alterluthen, das sij dij enelende licht lihen, vnd eyn tuch laßin ufflegin, vnd eynen grosschen sal man pauperibus gebin, vnd czweyne alde groschen den czwen terminerern, ab sij do heyme synd, das itzlicher sal leßen eyne selemesse; Were abir das nicht, so sal man die czwene alde groschen ouch gebin armen luthin, den selen zcu troste etc. Dieselbien zcwei schogk groschen ierlichis czinß gelabin wir egeschrebin Hanns Ritter, Burgermeister, Jacoff bogk, Mathei zciselman, Cleyne michel, Nickel leman, mertin roder, Ratczluthe vnd gantcz gemeyne zcu lißnigk, vor vns vnd alle vnßere nachkomelinge dem egnanten Ern Johanße, dem pfarrer, altaristen, Schulemeister, vnd kirchener, vnd zcu wachs alle iar zcu gebin vnd zcu reichin uff Sulche tage, vnd in allir moßen, alz obin geschrebin stehit, ane allirleye hynderniße vnd intragk bie vnsern guten truwin. Wo wir das nicht entetin wy vns denn dij obingeschrebin hern darczu brechtin geistlichen addir werltlichen, das wir halden musten, dorumb sullen sij von vns vnd vnsern nochkomelingen vnuordacht vnd ouch vnbeteidiget bliben. Dez zcu eynem waren bekentniße habin wir oben geschrebin Hanns Ritter etc. vnser Stad Insigil an dißen uffin briff mit willen vnd wissen laßen hengin, der gegebin ist nach gots geborten virczenhundert Jar, darnach in dem xxxix Jare, an dem abunde vnser liben frauwen tage klibe, den man nenneth zcu latin anunciacionis marie.