Brief des Abtes Anthonius zu Buch an die Bürger von Belgern.

Vnnsern grus zuuor, Liben getrawen, Ewer schreiben an vns getan, haben vorleßen, vnd dorinne keine warheit befinden, wie ir fur In andern sachen auch gethan hat den es hat vns am nechsen Sontag vnser Pfarr bericht vnd die andere Person, das Ihr denselbigen prediger selbst hat vorschafft welchen der pfarrer nicht hat wolt zulassen Habt Ir in mit eigener torst vnd gewalt In die kirche gefuhrt do zu predigen, Ist er auch fur vff den predigtstul kommen, vnd das Wort Gots wol vorkundiget, hat Ir ewrn martinischen prediger genommen, vnd mit samlunge des Volcks hynnawß In vnser liben frawen gegangen, vnd do vielleichte die nawe ketzerische lere gehort und derhalb begern von euch, Ir wolt euch des furnehmens enthalten, angesehen, das euch die kirche zu regirn nicht zusteht, Wo aber vnser vorordenther prediger euch nicht gnugsam ist, so wir uns des belernen, wollen euch mit der Zeit einen andern zuschicken. Indeme thut Ir vns zu Dancke Eilenden gebl.
Buch Mittwoch nach Johannis Baptist